မြန်မာစာလုံးပေါင်း သတ်ပုံကျမ်းအား အဆင့်မြှင့်တင်ခြင်း
23 April 2012
မြန်မာစာလုံးပေါင်းသတ်ပုံကျမ်း ဆိုပြီး ၂၀၀၈ ခုနှစ်မှာ ဘလော့ဂ်တစ်ခု တည်ဆောက်ခဲ့ပါတယ်။ အဓိက ရည်ရွယ်ချက်ကတော့ သတ်ပုံကျမ်းစာအုပ် အလွယ်တကူ မရနိုင်တဲ့ နိုင်ငံခြားရောက် မြန်မာတွေအတွက် ရည်ရွယ်တာပါ။ Web Programming လည်း ကောင်းကောင်း နားမလည်တော့ ကိုယ် နားလည်တတ်ကျွမ်းတဲ့ Blogging နဲ့ပဲ အဲဒီ သတ်ပုံကျမ်း Website ကို ဖန်တီးခဲ့တာပါ။ အခုအချိန်ထိဆို Page View ပေါင်း တစ်သိန်းကျော် ရှိတာကို တွေ့ရတော့ အများအတွက် အသုံးတည့်နေတယ်လို့ ယူဆမိတယ်။ ဝမ်းသာပီတိလည်း ဖြစ်မိပါတယ်။ တကယ်တမ်းတော့ ဒီဆိုဒ်လေးဟာ ဘလော့ဂ် မဟုတ်ဘူးဆိုရင် ပိုကောင်းလိမ့်မယ်လို့ ယုံကြည်တယ်။ ဘာလို့လဲဆိုတော့ အခုအတိုင်းဆိုရင် စာလုံးတစ်လုံး ရှာရတာ နည်းနည်း ခက်နေသလိုပဲ။ ဘလော့ဂ်ဆိုတော့လည်း ဘလော့ဂ်နဲ့ တူအောင် ကန့်သတ်ချက်တွေ ရှိနေတာကိုး။
၂၀၀၈ ခုနှစ်က ဒီဆိုဒ်လေးကို မြန်မာစာလုံးပေါင်းသတ်ပုံကျမ်း ဆိုတဲ့ မြန်မာစာဌာနက ထုတ်တဲ့ စာအုပ်ကို အခြေခံပြီး လုပ်ထားခဲ့တာပါ။ တကယ်တမ်း သုံးကြည့်လိုက်တော့ ကိုယ်လိုချင်တဲ့ စာလုံးတွေ မပါလာတာ အများကြီး တွေ့ရတယ်။ ဒါကြောင့် တတ်နိုင်သလောက်တော့ ဖြည့်သွားမယ်လို့ စိတ်ကူးခဲ့တာ အမှန်ပါ။ ဒါပေမယ့် စိတ်ပဲ ကူးနိုင်ပါတယ်။ လက်တွေ့ အကောင်အထည် မဖော်နိုင်ခဲ့ဘူး။ နောက်ပိုင်း မြန်မာစာလုံးပေါင်း သတ်ပုံကျမ်း နှင့် ခွဲထား ဆိုတဲ့ စာအုပ် ရလာတော့ ခွဲထား အပိုင်းကို ထပ်ထည့်မယ်လို့ ရည်ရွယ်ခဲ့တာ အခုတော့ စပြီး အကောင်အထည် ဖော်ဖြစ်နေပါပြီ။ ကျွန်တော်လည်း အားရင် အားသလို စာရိုက်နေတာဆိုတော့ အများကြီး မပြီးသေးပါဘူး။ အတိအကျ ပြောရရင် အခုမှ ကကြီး ပဲ ပြီးသေးတယ်။
ဒီ သတ်ပုံကျမ်းကို စာလုံးတွေ စုံနိုင်သထက် စုံအောင်၊ ရှာဖွေရ လွယ်ကူသထက် လွယ်ကူအောင် ဘယ်လို လုပ်ရမလဲလို့လည်း အတော်လေး စဉ်းစားလိုက်ရတယ်။ ပုံစံကို ဘယ်လို ချရမလဲပေါ့။ အခု လက်ရှိ ချထားတဲ့ ပုံစံဟာ အဆင်ပြေလိမ့်မယ်လို့ မျှော်လင့်ပါတယ်။ တကယ်လို့ ဒီထက်ကောင်းမယ့် အပြင်အဆင် ရှိမယ်ဆိုရင်လည်း အားလုံး ဝိုင်းဝန်းအကြံပေးကြပါဦး။ အခုဆိုရင် ကကြီးမှာ ဝင်ရှာမယ်ဆိုရင် ကကြီးနဲ့ စတဲ့ စာလုံးတွေကို မြင်ရသလိုပဲ၊ အစစာလုံး ကကြီး မဟုတ်ဘဲ ကကြီးပါတဲ့ တခြား စာလုံးတွေကိုလည်း ကကြီး အုပ်စုထဲမှာ ရှာလို့ ရအောင် အသစ် ဖြည့်ထည့်ထားပါတယ်။ ဥပမာ ကုတ် ဆိုတဲ့ အုပ်စုထဲမှာ အရင်က ကုတ်နဲ့ စတဲ့ ကုတ်ဖဲ့ ၊ ကုတ်အင်္ကျီ စတာတွေပဲ ပါခဲ့တယ်။ အခုဆို ကုတ်နဲ့ မစပေမယ့် ကုတ်ဆိုတဲ့ စာလုံးပါတဲ့ ကျားကုတ်ကျားခဲ၊ မိုးကုတ်ပတ္တမြား စတာတွေကိုပါ ရှာနိုင်အောင် ထည့်ထားပါတယ်။ နောက်ပြီး မှားရေးတတ်တာကိုလည်း အမှားမှန်းသိအောင် ထည့်သွင်းပေးထားတယ်။ ဥပမာ မိုးကုတ်စက်ဝန်း လို့ရေးရင် မှားမယ်၊ မိုးကုပ်စက်ဝန်း ဖြစ်ရမယ် ဆိုတာကို မိုးကုတ်ကုပ်စက်ဝန်း ဆိုပြီး ပြထားပေးတယ်။ နောက်ပြီး ကုတ် နဲ့ အသံထွက်တူတဲ့ ကုက်၊ ကုဋ်၊ ကုပ် စတဲ့ စာလုံးတွေ ပြောင်းရှာလို့ လွယ်အောင်လည်း လင့်ခ် တစ်ခါတည်း ထည့်ပေးထားလိုက်တယ်။ ပြီးတော့ ကန်စွန်းရွက် ဆိုတဲ့ စာလုံးကို တချို့က ကဇွန်းရွက် လို့ ထင်တတ်တာမို့ ကဇွန်းရွက် ဆိုတာကိုလည်း သတ်ပုံကျမ်းထဲ ထည့်ထားပေးပြီး ကဇွန်းရွက် (ကန်စွန်းရွက်) ဆိုပြီး ပြထားပေးပါတယ်။ အခုလို လုပ်ပေးထားခြင်းဟာ အသုံးပြုရတာ အတော်လေး အဆင်ပြေလာမယ်လို့ ယုံကြည်မိပါတယ်။ အောက်ပုံကို ကြည့်ပါ။
တကယ်လို့ စာလုံးပေါင်းသတ်ပုံကျမ်းထဲမှာ စာလုံးပေါင်း မှားရိုက်မိထားတာ ရှိရင်လည်း ကျနော်ကို အကြောင်းကြားပေးပါ။ အရင် ဆိုဒ်ထဲမှာ ဂန္ထဝင် ကို ဂန္တဝင် လို့ မှားရိုက်ထားတာကို ထောက်ပြခဲ့တဲ့ မပန်ဒိုရာ ကိုလည်း အထူး ကျေးဇူးတင်ပါတယ်။ စာလုံးပေါင်းသတ်ပုံကျမ်းလို့ နာမည်ပေးထားပြီး စာလုံးပေါင်းတွေ မှားနေဖို့ မသင့်ပါဘူး။ ဒါကြောင့် ကျနော်လည်း သတိရှိရှိတော့ ရိုက်ခဲ့ပါတယ်။ လူဆိုတာ အမှားမကင်းနိုင်တော့ အမှားကို ထောက်ပြလာမယ့်သူ အားလုံးကို ဝမ်းပန်းတသာ ကြိုဆိုပါတယ်။ နောက်ပြီး ဒီဘလော့ဂ်ကို ပိုမို ပြင်ဆင်ရင် အသုံးပြုသူအတွက် အဆင်ပြေဆုံး ဖြစ်မလဲ ဆိုတာကိုလည်း အကြံပြုနိုင်ပါတယ်။ နောက်ပြီး Web Programmer တစ်ယောက်ယောက်က သတ်ပုံကျမ်းမှာ Web Apps တစ်ခုအနေနဲ့ အားလုံးအတွက် အခမဲ့ တည်ဆောက်ချင်တယ်ဆိုရင်လည်း ကျနော်အနေနဲ့ ရိုက်ထားသမျှ စာအားလုံးကို ပို့ပေးပါ့မယ်၊ လှူပါ့မယ်။
အားတဲ့အချိန်ကနေ ဖဲ့ဖဲ့ပြီး လုပ်နေတာဆိုတော့ ကကြီးကနေ အ အထိ ပြီးဖို့ အချိန်ယူရဦးမှာပါ။ အမြန်ဆုံးပြီးအောင်တော့ ကြိုးစားသွားပါ့မယ်။ ဒီနေ့ (၂၃ ဧပြီ ၂၀၁၂) အထိတော့ ကကြီး အပိုင်းကို ပြင်ဆင်ဖြည့်စွက်ပြီးပါပြီ။ မူလကျမ်းစာအုပ်မှာ မပါတဲ့ တချို့ စာလုံးတွေကိုလည်း ကျနော်ဖာသာ ဖြည့်စွက်ထားတာ ရှိပါတယ်။ စာဖတ်သူအနေနဲ့ ကိုယ်သိတဲ့စာလုံး မပါသေးရင်လည်း အကြံပြုလို့ ရပါတယ်။ ဖြစ်နိုင်ရင် ဒေသအလိုက် ဘန်းစာလုံးတွေကိုလည်း လိုချင်ပါတယ်။ Page View ပေါင်း တစ်သိန်းကျော်အောင် အားပေး အသုံးပြုသူများ အားလုံးကိုလည်း အထူးကျေးဇူးတင်လျက်
ပီကေ
